¿Onde tán los sindicatos?

la eterna promesa

Ya la tasa paru tá peles ñubes por munchu que fai díes dixeren qu'Asturies soportaba meyor la crisis. Pero sí ye casi imposible que la tasa paru suba n'Asturies. La crisis asturiana ya españó nos ochenta y noventa y agora quiere facenos creer que gracies a la so xestión vamos da-yos gracies cada vez que mos llevantemos de la cama. Tantu esbarriar cayó-yos too enriba la tiesta.

Los datos meten mieu. Nel segundu trimestre el paru medró un 16,91% n'Asturies. La situación de parálisis ye absoluta. Pero lo peor de too ye que la tasa d'actividá ye del 52%, asina que con una tasa paru que puede tar cerca del 20% ye pa mexar y nun echar gota. Tamos peor qu'Andalucía, que ya ye decir. Pero nun vos esmolezais, que naide dimitirá y naide asumirá les responsabilidaes.

Si a esto sumamos los caberos capítulos de despilfarru del Musel, l'engañu de la financiación, la cagada del plus de productividá... entrugaraste ónde tán los sindicatos, que nun convoquen una güelga xeneral. ¿Ónde van tar? Pues conmemorando el 50 aniversariu de la revolución cubana.

¡¡¡Alcaldesa dimisión!!!

Por si nun lo barruntabeis, refiérome a la alcadesa de Xixón, esa muyer mayorina que facía unfavor a la ciudá retirándose del so puestu. Ente otres coses, ye cómpliz de diseñar un PGOU inválidu y que-y dieron puxu a sabiendes de que podía pasar lo que pasó.

Salió Morales atribuyéndose tola culpa nun xestu de sofitu a los sos ex-compañeros. Pero Pedro Sanjurjo, actual conceyal d'urbanismu tamién tien de dimitir. ¿Y qué pasa con Jesús Montes (Churruca)? Más-y valía menos pipes y sidra, y ocupase de que se ficieren les coses bien.

Otru capítulu d'incompetencies del ayuntamientu más progre d'España: el

ayuntamientu de Xixón.

Asina que: ¡Alcaldesa dimisión! ¡Sanjurjo dimisión! ¡Jesús Montes dimisión! ¿Y qué facemos con Jesús Morales? Tendría de tar nos xulgaos pagando les sos incompetencies.

Pero como equí tou val, nada d'esto va pasar y siguirán riéndose de nós.

Financiación, otru capítulu de "Puestinos y perres"

L'otru día, daben anuncia los tres principales periódicos asturianos de que Asturies sedrá la cuarta autonomía más beneficiada na financiación autonómica. La verdá que los datos taben abondo escuros, anque naide refugaba les palabres d'Areces. Yo quedé con rocea y paeciome too mui raro. Ye más, Areces atreviose a decir que taríemos per enriba de Cataluña nel ranking. Yo quedé a cuadros cuando lo lleí. Nun-y daba un res de credibilidá a too eso. Con esti gobiernu ya toi avezáu a nun creer nada hasta que lo vea. Lo que taba pernidio yera que los datos taben hinchaos y que yera imposible que fóremos a apurrir más que Cataluña. Lo que ye vergoñoso ya insultante ye que los tres periódicos asturianos nin siquier plantegaben dudes a estes declaraciones. Cualesquier persona qu'echase una güeyada al periódicu esi día podía quedase cola copla de que Areces y la so cuadriella yeren los grandes defensores d'Asturies.

Afondando un pocu nel tema paez ser qu'esos 11.000 millones a repartir pa toles autonomíes son un dinero que nun esiste, qu'España nun tien, y que namás que va contribuyir a aumentar el déficit públicu. Pero ye que si sumes lo que cada autonomía diz que va recibir salen cerca de 20.000 millones, asina que hai muches mentires en tou esto.

Volviendo a Asturies, resulta que güei La Nueva España sí qu'asoleya datos más concretos que mos ayuden a dir destapando la mentira d'Areces. Dicen agora los del PSOE que a esos 11.000 millones hai que suma-yos los 114.500 vixentes, y entós qu'el baremu fáese sobre'l volumen total: el presente y el futuru. ¿Por qué lo enguedeyen tantu? porque vamos quedar a la cola y cola nueva financiación van medrar más les desigualdaes ente les comunidaes.

Amás, IU per detrás aplaudiendo la gran negociación. ¿Y éstos son los salvadores d'Asturies? ¿Éstos dicen ser la verdadera fuerza asturiana? IU son a la FSA lo mesmo que la FSA al PSOE de ZP: unos sumisos, unos vendíos y unos mentirosos. Sólo quieren puestinos y perres.

Grandes obres socialistes (Canal de Historia)

Pretendo entamar con esti post una recopilación de los proyectos arquitectónicos que son reflexu del socialismu d'anguaño, obres que pretenden amosar una visión progre y son en realidá dalgo rancio, inútil, y que son poco representatives del llugar onde tán afitaes.

Pa entrar en calor voi encamentavos a que echeis una llectura a la entrada del blog de Duardo sobre dalgunes obres de Llaviana que podíen formar parte d'esa estaya d'enxendros arquitectónicos.

Pola mio parte voi dar la visión del remocique del paséu y aparcamientu de la playa La Griega de Colunga. Ye una obra que nun foi pensada pa la gran cantidá de xente que s'avera a esta playa pel veranu. Ye ún de los atractivos que tenía Colunga hasta agora. Pasose de varios cientos de places d'aparcamientu a tan solo un centenar. Amás, siempre foi una playa con gran reclamu por parte de les excursiones d'autocares que veníen de la cuenca y d'otros sitios. Pero agora solu hai cinco places d'aparcamientu p'autocares.

Aparte d'esto, el remocique del paseu nun foi acorde al entornu paisaxísticu, col Sueve a tiru piedra. Sí que facía falta un arreglu del paseu, pero non al estilu Benidorm. Pa min, perdió gran parte del encantu que tenía. Aquel muru piedra onde la xente s'atopaba mirando pa la mar agora ya nun tá y forma parte del recuerdu.

Imaxino a los illuminaos del ayuntamientu diciendo:

- Manín, vamos facer un paseu como'l de Benalmádena, ya verás que guapo va quedar.

- Sí, ho. La pena ye que hai esi monte ehí. Si non facíemoslu más llargu.

- Si, ties razón. Qué pena que nun seya llana esa parte pa montar unos cuantos chiringuitos perhí.

Sobre esto tamién fala Xuán Xosé nel so blog.

Encamiéntovos a que me faigais llegar les referencies d'aquellos diseños urbanos que veis perhí cuando paseais y que vos dan perceguera y ganes de vomitar.

Ehí vos dexo unes semeyes.