Lo del Musel ye de traca

Demientres los caradures del PSOE asturianu xunto colos collacios de IU nun dexen de quita-y importancia al escándalu de la ampliación del Musel, tovía nun sabemos si tala obra va pagala l'estáu español o los asturianos a traviés de los impuestos.

Lo que tá claro ye que Bruselas ya dixo que nun diba facese cargo d'esa maturranga del Psoe, que debió pensar que n'Europa son fatos y suelten perres como si nun costara. Nun digo qu'un proyectu nun pueda tener una replanificación y necesite una ampliación n'un momentu concretu, pero nesti casu hai un problema, y ye que'l gobiernu nun siguió los trámites llegales pa solicitar la ampliación a la UE. Una de dos, ó eso ye un error gravísimu de los responsables d'esta obra (PSOE - IU) que se-yos pasó la forma de proceder, ó hai dalguna maturranga escura per en mediu.

El casu ye que si a la fin esta obra la financia l'estáu español, ye un dinero qu'Asturies va recibir de menos pa otres inversiones por culpa de la llamentable xestión de los paletos que tenemos nel gobiernu.

Quiciás dalgún día mos enteraremos del trasiegu de perres qu'hubo equí. Mientres tantu a escuchar les babayaes que dicen tolos díes nos medios de comunicación estos "sinvergüenzas" y ver cómo la oposición (PP) permanez impasible.

Gracies Señor por tener un gobiernu ecoloxista

Ehí tá, Migoya, la más llista del llugar

Güei lleo en La Nueva España qu'Asturies quédase sola poniendo-y torgues al proyectu del AVE del Cantábricu.

L'argumentu que tienen estos mentirosos de la FSA ye que fadría muncho dañu a la costa. Hai xente que de verdá cree estes patoxaes. Éso ye lo triste, que entá son capaces a engañar a la xente con estos argumentos tán probes. ¿Dende cuando esti gobiernu miró pol mediu ambiente? ¿Qué estudiu ficieron pa argumentar esto?

¿Acasu el AVE a Madrid nun entafarra'l paisaxe? Recordemos que la variante Payares pasa per debaxu del macizu les Ubiñes. Lo que pasa qu'esi proyectu SÍ-yos interesa. Ehí SÍ tienen onde arrañar. Amás ési ye muncho más prestosu, ye un proyectu centraliegu que mos conecta cola capital d'España (y al decir esto, la Migoya, Areces & company esbabáyense enteros).

¡Pero si tenemos FEVE, que mos lleva a Francia a 36 km/h!!! Pero qué mas quereis!!! Ye que tais tol día pidiendo, fiyinos.

Esto ye de traca, dame vergoña cuntar perhí que'l percorríu Ferrol-Uviéu con FEVE tarda 6 hores y media, en percorrer 238km!!!

Pues sí collacios, Asturies quédase sola nesti proyectu por culpa d'un gobiernu de paletos y mentirosos. Tá perclaro que ponen torgues porque nun pueden sacar tayada pero que dexen d'engañar a la xente diciendo que-yos esmuel el mediu ambiente.