La camorra asturiana

Hai pocu que lleí el llibru Gomorra y nun pude dexar d'alcordame d'Asturies. La corrupción y el desdexamientu del políticu pa col so pueblu fueron les coses que más rocea me dexaron. Ésto nun ye la Campania, ye Asturies. Tampoco ye Caserta nin Nápoles nin Casal di Principe nin Secondigliano. Ésto ye Xixón, les cuenques, Uviéu, Avilés.

La rexón de la Campania y el puertu de Nápoles son bien afayadizos pal desendolque de tola actividá delictivo-económica de los clanes mafiosos, onde tola xente tá al serviciu de los patriarques del poder y naide gurgutia por mieu y por desidia, porque pamidea que nun son a ver que les coses dalgún día pueden camudar.

Asturies ye'l paraísu depresivo-folixeru más amañosu pa que'l socialismu faiga de les suyes ensín que la xente s'esmoleza por ello. Llevamos 30 años (la mayoría d'ellos de socialismu) ensín que a los continuos gobiernos-yos importare un res el sitiu onde viven y exercen el so poder y ensín que nunca amosaren un mínimu respetu pol so pueblu.

N'italia, el gobiernu ye cómpliz de les barbaridaes de los clanes. Munches de les atrocidaes delictives nun son asoleyaes nin tan siquier nos periódicos. Gobiernu y clanes contolen el drechu a la información. N'Asturies, los tres periódicos importantes y la televisión tán al serviciu del clan de Don Vito Albertini Areces. Camiento yo que la xente tien drechu a que dalgún mediu informativu fore críticu, denunciare la verdadera situación de les coses, el marafundiu de perres, pero nun ye posible n'Asturies.

Les noticies turbies al rodiu la xestión del dinero públicu que venimos oyendo los caberos meses paez que nun preocupen a naide. Tampoco la oposición (PP) faen nada por denuncialo. Una oposición que tá apoltronada dende siempre, bien garraos al so puestín y combayando coles actividaes mafioses del clan FSA-IU. Los casos Ovidio Blanco, Ampliación del Musel, Metrotren de Xixón, plus de la carrera profesional, la patética xestión de la financiación autonómica,... vienen sonando últimamente como pingarates d'información y que nunca tán claros. Naide dimite por ello, naide ye xulgau por estes coses.

Nes rexones de la Campania, Calabria y Sicilia, y por estensión el restu d'Italia, los gobiernos, collacios de los clanes, tamién malgasten dinero públicu y les coses tampoco tán clares nunca y tampoco naide dimite.

Lo de los sindicatos tamién ye otra de les coses que ye una vergüenza, tanto pol furrulamiento d'estes organizaciones como pol averamientu que hai al clan FSA-IU. Estes organizaciones son les encargaes de facer que nos tiempos de crisis que vivimos la xente té apigazada. Ye otra de les pieces fundamentales pa que l'engranaxe mafiosu socialista furrule dafechu.

Imaxino a Don Vito Areces diciendo coses como:

• Hay tres maneras de hacer las cosas: bien, mal y como yo las hago
• Te haré una oferta que no podrás rechazar
• No quiero verme condicionado por mi entorno, quiero que mi entorno se vea condicionado por mi