Asturies, ¿Sociedá enferma?

Qué solidariu ye l'asturianu coles demás cultures y los problemes ayenos. Ye una cosa que siempre se me vien a la mente y que me da muncha rabia porque somos los últimos en mirar pa lo nuestro y nun mos damos cuenta que sofitar les tradiciones y cultura asturianes nun ye de fatos nin d'aldeanos. Ye la única posibilidá que tenemos de sobrevivir como pueblu y non ser una estensión de Castiella.

Tenemos la falsa creencia de que lo que fai bien a España, fadrá bien a Asturies. Y éso nun ye asina puesto que España ye un país que tal y como tá montáu, cáda rexón, nación, comarca, autonomía o como se quiera llamar que conformen l'estáu español intenten apurrir cuantos más beneficios a cuenta del estáu, meyor. Porque too hai que dicilo, comunidaes como'l País Vasco o Cataluña, que tanta soberanía reclamen son a la vez dos de les autonomíes que más chupen de la piragua a cuenta del conxuntu d'España. Entós, ¿Por qué nun dexamos de pensar tantu nel bien d'España (dios me llibre de criticar esto, ye una cosa que veo mui bien, pero tou al so tiempu) y pensamos nos intereses d'Asturies? Camiento yo que precedentes hai abondo y nun hai más que mirar cómo tá Asturies güei pa dáse cuenta qu'está manera de proceder nun fai bien a Asturies.

Ésto ye un fechu que se vino repitiendo de forma cásique continua na hestoria d'Asturies y que a mio paecer responde a una mentalidá cazurra del pensar asturianu. Tenemos mieu a facer ruiu, nun queremos que mos oigan porque "a saber qué dirán", nun queremos dar que falar nun vaya ser que se mos critique por alborotadores, tenemos que seguir cola buena fama de pueblu folixeru y acoyedor con tol mundu, somos xente mui solidaria colos demás y nosotros nun tenemos problemes, equí furrula too bien dafechu. Ésto podría ser el decálogu del buen asturianu plural, progre, políticamente correctu y solidariu que piensa más nes nueves estaciones que van facer nel metru de Madrid que nel soterramientu de les víes de Xixón, que tá más esmolecíu polos resultaos de les eleiciones vasques que pol mal que pue face-y a Asturies la tercera llexislatura d'Areces, que tá más preocupáu pol terrorismu que pola continua salida de xente mozo d'Asturies pa trabayar fuera, que-y esmolez más despidu masivu de la factoría d'Opel en Zaragoza qu'el pieslle d'Arcelor, astilleros y un bon númberu d'empreses asturianes, que sufre más pol recorte de subenciones a la recoyida d'aceituna andaluza que pol desaniciu del campu asturianu.

Ye triste pero ye asina, Asturies lleva tola vida siendo pisoteada, primeru por mor del franquismu y depués por culpa'l centralismu de los nuestros gobernantes. Siempre dimos la posibilidá de que mos comiera la mierda del fumu de les fábriques en favor de que media España tuviera enerxía anque a cambiu recibiéremos un garrapiellu bien probetayu de puestos de trabayu. Siempre aplaudimos iniciatives de cálter solidariu con cualisquier pueblu, anque'l nuestru propiu fore denguneau.

Un exemplu estos díes que pue amosar esti pensar ye'l debate que tá xenerando la iniciativa del ayuntamientu d'Avilés de renomar los barrios y parroquies del conceyu con topónimos tradicionales. Ésta medida fizo que xorrecieren bien de detractores d'esti cambiu alegando munchos d'ellos que "Las Meanas" siempre foi "Las Meanas" y non "Les Meanes" porque esti últimu yera el nome que-y daben los aldeanos a esta zona d'Avilés. Coses como esta xeneren muncha polémica na sociedá asturiana, pero la noticia de que l'arquitectu xefe del ayuntamientu de Xixón haya cometío irregularidaes nel plan urbanísticu de Cabueñes pasen desapercibíes pa la mayoría, hasta pa la oposición nel ayuntamientu de Xixón, que nin siquier pide la dimisión de naide.

Dicen que la sociedá vasca ye una sociedá enferma. Yo nun sé qué pensar, pero la asturiana mui sana non la veo. Depués de que Areces vaya facer tres llexislatures al mandu del gobiernu y coles consecuencies qu'esto tá trayendo, ye más propio d'una mentalidá masoquista y autodestructiva.

PD: La semeya tá tomada de http://asturies.blogia.com