Asturies, reflexu d'una sociedá suvencionada

Fai pocos díis conocíemos la noticia de que Du Pont va deslocalizar el so centru de finances de Tamón pa afitalu n'India. Ésto sedría una simple noticia d'un despidu masivu mas n'Asturies si nun fore porque "el Principado" lleva dando perres de tolos asturianos a DuPont dende la so puesta en marcha.

Nun hai munchu, alcuérdome qu'asoleyábase la noticia de que DuPont diba afitar el so centru de finances a nivel européu n'Asturies y convertíase ésti asina nun referente a nivel mundial. Y agora alcontrámonos con esto. Lo peor nun ye que mos hayan mentío a toos, lo peor de verdá ye la permisividá cola que cunten estes multinacionales pa facer lo que-yos dé pola gana habiendo chupao del bote lo que quisieron y más y nin siquier cumplir los oxetivos colos que s'instalaron nel valle de Tamón, que yera dar emplegu a muncha más xente que la que a la fin resultó ser.

Claro tá que nun ye l'únicu exemplu de despilfarru masivu de suvenciones a empreses que nun-yos importa un pitu Asturies y que sólo vienen a apurrir perres pal bolsiellu mientres dure y que nun tienen la menor rocea en desmontar el chiringu d'un díi pa otru y colar pa otru llau onde-yos lo dexen tovía meyor. Pongo por exemplu el casu de Capgemini, empresa del sector tecnolóxicu -que ye el que a mí me toca y del que tengo más o menos conocimientu-. Dieron anuncia milenta vegaes nos periódicos de tolos puestos que diben crease y que con esti contratu, el tecnolóxicu convertíase nun sector punteru n'Asturies. Sí ye verdá que hai munchos mozos asturianos trabayando en Capgemini, anque con sueldos ridículos. Pero lo peor de too ye que munchos de ellos nun faen un res, sólo tán ehí porque ta pactao que tienen que tar trabayando x persones. Con esto pue facese unu la idega de que munchos d'estos puestos creaos a golpe de subvención son en realidá puestos ficticios, que nun aporten un espoxigue personal al empleáu y qu'en cuantes que finen les suvenciones van desaniciase. Y si non, ¿Qué apostais?