Si tolos asturianos fóremos estranxeros...

Falando l'otru díi con un compañeru de trabayu madrilanu, dime más cuenta si cabe que los foriatos n'Asturies munches vegaes fáennos abrir los güeyos en delles coses relacionaes cola conocencia del nuestru entornu, de la nuestra tierra asturiana y de les costumes que foron desendolcándose dende fai sieglos hasta'l díi de güei.
Esti puntu del que vos falo ye'l primer interesau en conocer la cultura del sitiu onde vive, la hestoria, los vezos, la mitoloxía, la llingua... Amuesa un interés pergrande por tolo relacionao cola temática asturiana.
Nun toi escubriendo ná nuevo. El fechu de que los asturianos somos los primeros que desprestixamos lo nuestro ye de sobra conocío, pero tendría de danos que pensar.
Por exemplu, esti personaxe, fai dellos díes entrugome acerca de la regla que rixe la formación de los terminaos en "-u" nel asturianu, asina como los terminaos "-es". Enxamás viera yo un asturianu "de a pie" interesase pol usu amañosu y les regles que lo rixen de la llingua de la que ye herederu.
Tamién ye un gran interesau pola bebida sagrada d'esti país:la sidra, y el so procesu. Mesmamente fai dellos meses empresté-y yo el famosu llibru de David Rivas: "La sidra asturiana". Nin que dicir tien que lu leyó encantáu de la vida. De fechu, entá nun me lu devolvió. Debió gusta-y dafechu.
Estes situaciones repítenseme a diariu con esti collaciu. Si tolos asturianos fóremos estranxeros nel nuestru propiu país quiciabes les coses foren d'otra manera.